Mesaj Evèk Legliz Katolik Ayiti yo voye pou Pèp Bondye a: pè yo, mè yo, frè yo, fidèl layik yo ak tout moun ki gen bòn volonte nan okazyon fèt Nwèl 2024 la

1 Se pou kè poze ak favè Bondye Papa nou ak Jezikri, Granmèt nou an, rete avèk nou jodi a ak pou tout tan !

2 Soti nan dat 26 pou rive 28 novanm lan, Nou menm, Evèk Katolik yo an Ayiti, nou te òganize 142èm Asanble Òdinè nou. Nan finisman Asanble sa a ak nan kòmansman Tan Lavan an, nou voye mesaj ankourajman sa a pou nou. Se yon mesaj ki jwenn enspirasyon li nan pawòl pwofèt Izayi ki di : « Moun ki mete espwa yo nan Granmèt la ap mache san yo pa dekouraje, san yo pa janm febli » (cf. Izayi 40, 31). Pawòl sa yo te gide lapriyè nou yo ak refleksyon nou yo sou lavi Legliz nou an ak sitiyasyon difisil peyi nou an.

3 Pandan n ap prepare nou pou n selebre fèt Nwèl la, fèt nesans Sila a ki pote delivrans pou tout moun sou tè a, je nou rete fikse sou li pou nou kapab jwenn konsolasyon, fòs ak kouraj pou nou kontinye mennen bon konba a. Konviksyon sa a fè nou renouvle volonte nou pou nou toujou akonpaye pèp la nan mitan tout soufrans ak kalamite li yo.

4 Nesans Sovè a se yon Bon Nouvèl pou tout moun Bondye kreye pòtre ak li (cf. Jenèz 1, 26-27). Bondye sa ki tounen Moun nan envite nou reflechi anpil nan yon moman kote peyi nou an ap travèse gwo pwoblèm. Anpil fanmi ap viv nan yon mizè ki rèd anpil. Mete sou sa, vyolans fè moun pa kapab viv tankou moun. Anpil moun lage san kay epi san espwa. Gen granmoun ki abandone, ki gen kè sote ak lapenn, paske yo pa gen kapasite pou yo fè fas ak yon reyalite konsa. Jèn yo ak timoun yo gen anpil enkyetid pou avni yo, yo anvi dekouraje. Sitiyasyon makawon sa a se rezilta vyolans, kòripsyon ak move fason y ap mennen bak peyi a.

5 Pawòl Bondye ki tounen moun pou bay moun diyite li kòm pitit Bondye pouse nou pran an konsiderasyon reyalite malouk sa yo. Konsa, Nou menm, Evèk Katolik an Ayiti, nou te di semèn pase yo kijan tout sa k ap pase nan peyi a twouble nou epi fè nou mal. Kounye a ankò, nou lanse yon apèl bay tout frè ak sè nou yo pou nou di nou : peyi nou an danje, nou nan ka. Devan gwo malè pandye sa a, se pou tout aktè ki nan sosyete a rive depase divizyon ak konfli pou sove peyi a. Poutèt sa nou mande :

1. Moun ki gen zam nan men yo k ap touye, k ap piye, vyole, boule epi fè moun pati kite kay yo, sispann ak vye zak malonèt sa yo. Vye zak sa yo pa bon ni pou peyi a, ni pou pèp la, ni pou nou menm k ap fè yo.
2. Moun k ap fè mesye-dam sa yo jwenn zam ak bal an kachèt yo, sispann alimante vyolans avèg sa a k ap fè san koule nan sosyete nou an chak jou.
3. Otorite Leta yo, chèche travay nan enterè tout moun olye nou sèvi pwòp enterè pa nou ak enterè pati nou. Kontwole dwan ak frontyè yo, pò ak ayewopò yo, ni prive ni piblik, pou bloke trafik zam ak minisyon ilegal k ap antre nan peyi a. Fini ak pwoblèm ensekirite a antan n ap chèche bon mwayen pou retire zam nan men timoun, nan men jèn ak granmoun ki pran nan toubiyon vyolans la. Reponn, san pèdi tan, a bezwen moun ki deplase yo. Travay pou bay tout viktim yo jistis. Retabli lòd ak lapè.
4.  Kominote Entènasyonal la, sonje pwomès ak angajman nou yo pou nou ede Ayiti soti nan bafon vyolans ak izolman li ye a. Fè tout sa nou kapab pou zam ak minisyon ilegal sispann antre nan peyi a. Popilasyon sa a ki lage pou kont li a dwe ka konte sou solidarite lòt Nasyon yo.

6 Tout gason ak fanm nan peyi a, n ap di nou : malgre tout sitiyasyon malouk sa yo, se pou nou kontinye mache san nou pa dekouraje. Se pou nou tout tounen temwen lesperans. Chak Ayisyen, chak Ayisyèn, kèlkeswa kondisyon li, gen yon wòl pou jwe nan transfòmasyon peyi a. Nou ankouraje nou chèche pratike lapè nan fanmi nou yo ak nan kominote nou yo. Patisipe nan tout desizyon k ap chèche solidarite, edikasyon ak sansibilizasyon pou lapè. Sen Pòl di nou : « Si yon sèl manm kò a ap soufri, tout lòt manm yo pran soufri ak li » (1 Korentyen 12, 26).
7 Fèt Nwèl la fè nou sonje Bondye vin tounen moun nan mitan nou. Konsa, Bondye leve diyite lavi chak moun byen wo, li fè li san parèy. An nou chèche renmen li nan chak frè ak chak sè nou yo. Volonte Bondye se pou nou chèche «fè tout sa nou kapab pou chak moun reprann fòs ak asirans pou gade avni an ak yon lespri lib, san paspouki, yon kè ranpli ak konfyans epi yon entèlijans ki wè klè» (Pap Franswa). Se sa Tan Lavan an mande nou, li menm ki mete nou sou wout pou nou ale nan gran Jibile 2025 lan. Pap Franswa ap ouvè Jibile sa a nan Lamès 24 desanm k ap vini an nan vil Wòm. Nan dis (10) Dyosèz nou yo, nan peyi a, n ap ouvè Jibile a dimanch k ap 29 desanm nan sou tèm « Pèleren Lesperans ».

8 N ap swete tout moun yon Nwèl 2024 ak yon Lane 2025 ki pote sekirite, lapè ak renmen. Ak konkou lapriyè Manman nou, Lavyèj Mari, n ap mande Bondye tout gras ak benediksyon li pou nou tout Pèp Ayisyen an.

Mesaj sa a soti nan Kay kote Evèk Katolik peyi Ayiti yo konn reyini, Lilavwa, jou ki te 5 desanm 2024 la.