Mesaj monseyè Max Leroy Mésidor sou masak Ponsonde a [ 3 oktòb 2024]

📅 Texte publié le dimanche 6 octobre 2024

👁 Suivez-nous sur Bluesky

Teks ke nou pral li a, se yon transkripsyon de yon entèvensyon Monseyè Max Leroy Mésidor, ki se Achevèk Pòtoprens, te fè samdi 5 oktòb ki sot pase a, sou gwo masak ki te fèt jou ki te jedi 3 oktòb la, nan komin Ponsonde, ki nan Depatman Latibonit.

Anvan li prezante kondoleyans Legliz la bay tout fanmi viktim masak sa a, ak tout moun nan zòn Ponsonde e nan Depatman Latibonit, Monseyè a poze otorite yo, ki sanble yo pa enterese ak sò pèp la, kèk kesyon. Anpil lòt moun te konn ap poze tèt yo kèk nan kesyon sa yo. Avèk kouraj, li mande yo eske gen yon « pwojè sekrè pou demantibile peyi », pwiske yo kite mesye ak zam yo fè kraze brize lè yo vle, kote yo vle, pafwa menm ak yon anons anvan, e yon awogans apre.

Peyi a malad. Pèp la bouke, li mande sekou. E kisa otorite yo ap fè? Y ap fè reyinyon, y ap vwayaje pou al pale de fòs miltinasyonal ki deja anplas depi kèk mwa, san pèsonn pa wè yon chanjman ou yon alemye.

Ann tande oubyen li mesaj la…

Bonjou pou tout moun ki ap koute nou, espesyalman moun Depatman Lwès ak Latibonit.

Nou konstate tout peyi a malad. Tout peyi a ap soufri, e yo ap soufri lontan. Men Depatman Lwès ak Latibonit pi mal. Se 2 pi gwo depatman nan peyi a.

N ap mande nou, eske gen yon pwojè sekrè pou demantibile zòn sa yo? Eske yo gen yon plan pou fini ak zòn sa yo? Eske gen yon plan pou fini ak peyi a?

Chak semenn se rèl, se tèt chaje, se lanmò. Depi 2 zan, komin Ti Rivyè Latibonit lage pou kò l; pa gen prezans lapolis. Menm bagay lapou komin Lyankou. 2 bèl komin; 2gwo komin; 2 zòn ki te gen lavi. Jodiya, se dezespwa.

Konbyen fwa, moun zòn sa yo mande sekou? Konbyen fwa moun Lyankou di y ap kontribye pou ede lapolis vin nan zòn nan? Plizyè asosyasyon voye pwopozisyon bay otorite yo. Okenn repons! Anyen pa fèt! Popilasyon a lage poukont li. Lyankou abandonnenn depi kèk tan. Tout moun pati. Ti Rivyè ap debat. Kèk moun rete ap konstate piyaj ki ap fèt chak jou. E chak moun ap tann tou pa yo.

Depi kèk tan, gen gwo menas ki t ap fèt sou Ponsonde. Ou pat santi te gen gwo dispozisyon ki te pran pou evite sak rive jounen jodi 3 oktòb la.

Etan m ap voye kondoleyans Legliz la bay tout fanmi ki nan lapenn, m ap poze kesyon a otorite yo, a manm Konsèy prezidansyèl la, a premye minis la, a CSPN nan, chèf lapolis la. Kilès ki ap veye sou popilasyon an? Kouman fè tout sa mesye ak zàm yo di yo pral fè, yo rive fè l kanmenm, sof kèk ti eksepsyon? Yo anonse yo pral pran yon zòn, kèk tan apre, yo pran l. Poukisa tout reyinyon, tout vwayaj sou zafè fòs miltinasyonal la, alòske, malgre genyen manm ki la, bagay yo vin pi grav? Ekzanp Maryani, Gresye, Gantye, Ponsonde. Kisa n ap tann pou nou deside vrèman bay pèp la, posiblite pou li viv anpè, lakay li? Konbyen zòn n ap kite tonbe ankò anvan nou montre nou gen sansiblite pou pèp la? Eske nou pa wè, otorite yo, nou nan menm wout ke moun ki te la anvan nou yo?

Tranzisyon n ap dirije a pa montre ditou li se yon tranzisyon « rupture ». Menm erè ki te konn fèt yo se menm yo ki kontinye ap fèt toujou: Menm eskandal, menm pwoblèm, menm endiferans. Pèp la bouke, li mande sekou.

Otorite yo, ouvri zòrèy nou, souke kò nou, bagay la grav. Fè tout jefò nou, fè tout posib nou pou nou fèmen wobinè san sa ki ap koule nan peyi a. Mwen mande nou sa avèk fèmte, avèk tout respè tou, nan non Legliz la, nan non tout pèp Bondye a ki ap soufri, nan non pèp Depatman Lwès ak Depatman Latibonit, nan non pèp Ponsonde ki gen dlo nan je jodiya, avèk tout pèp Latibonit a.

Ke Bondye veye sou pèp li a! Ke li veye sou Ayiti!

Se Achevèk Pòtoprens la,
Monseyè Max leroy Mesidor

[Dimanch 6 oktob 2024]

📂 Textes Similaires:

  1. Mesaj Monseyè Max Leroy Mésidor, Achevèk metwopoliten Pòtoprens, apre ensidan ki te pase jedi 13 avril la
    Teks sa se transkripsyon yon adrès ke Monseyè Max Leroy Mésidor, achevèk Pòtoprens, te bay après zak briganday e kidanapin moun ak gwo zam te fè apre yon mès ki li t ap selebre jou ki te jedi 13 avril 2023. Nan adrès sa a Monseyè, pandan li t ap prezante senpati pa fanmi viktim yo, denonse sitiyasyon peyi ap viv la, kote pèsonn moun pap viv ak kè poze. Li pwofite mande moun nan Leta yo ak moun ki gen gwo zam yo ki sa dèyè tèt yo, ki pwojè yo genyen pou yo blije ap touye, fè krazebrize...
  2. Twazyèm Kominike Konferans Evèk katolik Ayiti yo sou zafè eksplozyon ki te pase lakay Monseyè Pierre-André Dumas
    Frè n ak sè n yo, Kè poze pou nou nan Kris la, Sovè nou an! 1. Dimanch 18 fevriye a, nan kòmansman sware a, yon gwo eksplozyon fèt nan […]...
  3. Mesaj Monseyè Pierre-André Dumas a Pè ki nan Dyosèz li yo, depi yon lopital nan Miyami
    Yon mesaj de monseyè Pierre André Dumas depi yon lopital ki nan Miyami, nan Florid, apre li te fin sibi yon gwo operasyon. Menm lè ou santi, lè w ap tande mesaj enpwovize sa a, ke li te anba rès efè anestezi a, w ap dekouvri yon dirijan espirityèl ki, malgre soufrans li, pa bliye responsabilite l. Se anvan tou, yon pastè ki gen lafwa ki t ap pale. Yon pastè ki t ap pale "collégialement" avèk pè li yo. Li rekonèt bon travay yo ap fè nan yon dyosèz tou nèf. Si ou tande, oubyen li mesaj la avèk...
  4. Nòt Konferans Episkopal d Ayiti a sou dènye dekrè Pouvwa Egzekitif la mete deyò nan Jounal Ofisyèl Peyi a
    Nan nòt sa a, nou menm, Evèk Katolik Ayiti yo, nou prezante salitasyon fratènèl nou bay fidèl nou yo epi tout konpatriyòt nou yo. Nan jou difisil sa yo, lespri nou tout boulvèse akoz tout mal k ap minen Nasyon nou an ak tè nou an......
  5. Nòt Konferans Evèk Katolik Ayiti yo sou sitiyasyon sosyopolitik la
    Nan moman tèt chaje nap viv jounen jodi a, rèl soufrans kè sere sè ak frè nou yo rezonnen byen fò nan kè nou menm Evèk yo, bèje Pèp Bondye a. Men sa ki lakòz kout rèl sa yo : se gang ki pouse tankou djondjon ak gwo zam lou nan men yo, yap fè lalwa nan peyi a; se vyolans tout kalite tout koulè; kidnaping, ensekirite ki anpeche moun sikile libelibè nan peyi a, se krim, enpinite, enstabilite politik, estrikti Leta a ki tonbe andegraba; se lavi chè, se Kovid-19 la ki tounen pi rèd, elatriye....